Pòtoprens , Jedi 24 mas 2021 (tinouvel.com)
ki yès ki touye ajan 3 UDMO Pierre Richard Mystal?
 |
| Ajan 3 Pierre Richard Mystal |
San okenn dout ,pou la polis ak gouvènman defakto Ajan 3 Pierre Richard Mystal te viktim nan yon afwontman ant lapolis ak polisye ki sòti nan "Fantom 509" nan kafou Delma 31 ak Otowout Delma, se la li ta resevwa yon bal san okenn jounalis ki te sou plas pat ka di ki kote nan kò li resevwa bal sa a e yo pat remake tras san sou sèn krim lan.
 |
| pwosè vèbal jij de pè Monbrun |
Men pwosè vèbal jij de pè Delmas Monbrun Martine Louisane pote yon lòt vèsyon sou evènman sa a, li konstate nan mòg Lopital Bernard Mevs yon kò san vi li dantifye ak matrikil ki rele Pierre Richard Mystal ak inifòm la polis udmo sou li, sou kò li wè yon twou nan vant li (thorax) nan flan gòch e li te konstate san nan nen li tou .Konstat sa a te fet an prezans Samyèl Salomon responsab mòg la ki di li pat jwenn ni bous ni zam polisye a.
Yon lòt kote nan sèvis triaj nan lopital bernard Mevs Jij de pè Delmas ekri li wè epi konstate yon nèg klè ki gen unifom lapolis e li di li rele Dominique J Domercant Ajan 3 nan UDMO jij Monbrun di li wè e konstate nan jamb dwat polisye sa a yon bandaj.
Daprè jij de pè Delmas Monbrun Martine Louisane ajan UDMO deklare epi siyen dèyè li pawòl sa nou repwodwi jan li ye a:" Majistra jodia 11zè pral midi yo nan k-fou Delma 31 mwen wè yon machann ma l ede l e se lè sa mwen resevwa yon bal nan janb dwat,mesye ki mouri an li te nan yon lot machin nan menn pozisyon an se li ki tap kondui,mwen pa wè moun kite tire yo."
ki konstan nou fè nan deklarasyon Dominique Jocelyn Domercant Ajan 3 nan UDMO:
1- Nou remake li pa di yon polisye ki mouri, li pa menn bay non koleg travay nan UDMO sa vle di anvan bal pete a yo te gen dwa pat jann rankontre anvan aksyon yo.
2- Li pa pale de afwontman ant 2 gwoup ame e li pa fè tou referans a gwoup "Fantom 509", nan depozisyon li te bay Majistra a.
An reyalite pa gen moun ki konnen ki yès ki tire Ajan Mystal Pierre-Richard la? anpil kesyon rete san repons tankou:
Pou ki sa pat gen san sou sèn krim lan?
Pou ki konsta pat fèt sou lye Krim lan?
Pou ki polis syantifik pat vinn sou lye krim pou chache endis yo ,douy bal yo?
E Pou ki se nan mòg la konsta jij de pè a te al fè ?
Repons a 4 kesyon sa yo ap ede nou konnen ki sa ki te reyèlman pase nan Lendi 22 Mas sou otowout delnas nan kafou Dema 31.
Ronald Leon
tinouvel509@gmail.com
Comments
Post a Comment